‘FINISHING STRONG’ by Dr. KL Biakchungnunga

• Dr. KL Biakchungnunga

(Thu lakna : 14th August 2011, Thalaite Thian)

Well begun is half done: ‘A bul ṭan ṭhat chu a zâtve zawh tluk a ni’ tih thu hi kan hre fo tawh âwm e. Mahse, a bul ṭan ṭhat ringawt hian tâwpna ṭha tak a hrinchhuah si loh chuan, eng tihna mah a ni lo. Marathon Race-ah hian atira tlân chak tur tur viau, a tâwp lama sawngnawi deuh kan hmu fo. Naupan laia hmêlṭha leh fel, puitlin hnua chhe beu bou deuh, nungchang dukdak lo deuh an awm fo bawk. Bul ṭan ṭhat’ hi a pawimawh. Mahse ‘a zâtve zo’ ang chauh a la ni. “Finishing well is a crowning blow” tih hi i vawng reng ang u. “Finishing well” ai mahin “Finishing strong” hi a ropui lehzual.

Finishing ṭha lo: “A finishing a ṭhâ” tih hi infakna leh inchawimawina ropui tak a ni. Footballer zingah duhthusâma ball thunun thei, finishing ṭha lo an awm nual. A thinrimthlâk a, an ngeiawm duh riau. Delhi-a awm ṭan tirh vela ṭhalai chuanawm leh duhawm, awm rei tawlh tawlha che nâwi tawlh tawlh, Delhi chhuahsan dâwn kumah phei chuan thi reng sia nung hming pû, dam reng chunga uih deuh vut vut kan nih hlauh chuan, a pawi viau dâwn a ni. Bible-ah hian atira chhuanawm tak, chhe deuha an nun tlâng kàwm kan hmu nual. Mi pahnih chauh lo en ta ila:

Lal Saula kha a tlâwntlâi a ṭhà. A hleitling a, a khabe tawng phâk pawh an awm lo (1 Samuela 9:2). A chak a, a huaisen bawk. Zawlneihovin Pathian Tharau pâwlna an chan ṭum pawhin, Saula hian a chang ve a, a ṭawng ve bual bual a ni (I Sam 10:10). 1 Samuela bung 11 i chiar chuan, Ammon ho a beih chanchin i hmu ang.

Mipui pawhin an ngaisâng vet vet khawp mai. Israel ho hmêlmâ Philistia hote pawh a tlàwm vek a ni. Mahse, Amalek ho an beih ṭumin Pathian thû a zâwm lo va, Pathianin a hnâwl ta a. A kawchhûngah ramhuai a lût a, lalṭhutthleng chu keipui sa hauh hlur ringawtin, tualthah duhna thinlung a pu ta a. Pathian ṭihna a neih tawh loh avângin Pathian hriak thih hial pawh thah tumin a veh a veh tih kan hmu. A tâwpna chu mahni intihhlum (suicide) a ni ta a ni (1 Samuela 31:4).

Juda Iskariota kha Isua zirtirte zinga tel, sum enkawltu (Treasurer) ni pha ngat a ni (Johana 12:6). Engkim kalsana Isua zuitu a ni kan ti thei ang. Isua thilmak tih a hmuh zozai atang pawh khân Pathian thiltihtheihzia chu a hmu chiang hlein a rinawm. Mahse, Pathiana rinna nghah ain sum thiltihtheihna a ngâihlu zâwk a, a pawisa kawl chu a hmang ru ṭhin a ni. Isua aia a thlan zâwk sum hmang chiahin Setanan a phih-âwk a, mahni intihlum bawkin a hmâwr a bâwk ve leh ta a nih kha. “Isua zirtirte zinga mi, an Treasurer a inawkhlum” tiin YMA tlângauvin rawn puang ta se, mi a barakhaih duh âwm mang e! Isua bula awm fo si hian, Isua aia thlan zâwk leh buaipui zâwk kan lo nei ve reng em? Kan sum leh pâi te hi Pathian min pêk, Pathian sum a ni. Pathian duhdân ngaichâng miah lovin kan duh duhin kan hmang ve thin em? Isakariota te, Iskarioti te kan lo ni palh ang e.

Finishing strong : A pian tûr thu Vantirhkohin a hrilhlâwk ngat, Pathian tana serh hran (nazarit), khawvêl mihring piang tawh zinga chak ber leh tharum ngah ber, Samsona khân chaklohna a nei. Hmeichhia (nula) lakah a thaw-nêm fo ṭhin tih kan hria. Nula an nih tawh phawt chuan ringlo mi, Philistia mi pawh ni se a iai lo. Mahse, nula lama a chaklohna hi Pathianin hmanruaah a hmang tih erawh kan chhinchhiah a pawimawh (Roreltute 14).

Mahse, a chesual ta tlat. Tû’ mâ hnena sawi chhuah loh tûr, a ropuina leh chakna thurûk, Pathian nena an inkâr thuthlunna chu nula Delili râwlrûk ta mauh mai. inchhir em? Pathian lakah inthiamlohna a nei em? A bialnu Delili hian a bual â tawh hle a ni ang, Pathian nena an inkâr thurûk a hralh hnu pawhin, inthiamlohna emaw nuam lo tihna emaw a nei miah lo niin a lang. A bialnu mal chungah thlamuang êm êmin a la muhil zui thei a ni. A muthilh hlânin a chakna thurûk chu lâksak a ni a, a rawn harh chuan Pathianin a kalsan tawh tih a hre miah lo! Chuti khawp chuan a bialnu hian a dâwi-mû a ni. A mit a del phah ta a. A hmêlmâte salah a awm zui ta a nih kha. Mahse, tuarna aṭangin a inhmuchhuak leh a, Pathian aṭangin chakna thar a dawng leh ta a ni. Tichuan, ‘finishing well’ mai ni lovin, ‘finishing strong’ kan tih ang kha Samsona tâwpna chu a lo ni ta a ni. A dam laia hmêlmâ a tihhlum aia tam zâwk a thihchilh tih Rorêltute 16:30-ah kan hmu a ni.

‘Strong finisher’ zinga hmaih theih miah loh chu Tirhkoh Paula a ni. Mihring tak pawhin a ngaihsânawm. Tih tawh lam ti vak chi, mi hrâtkhawkhêng a ni tih a chianna chu a pianthar hmâin Mosia Dân zir mi leh zawm tum tlat, pharisai a nia. Dân thua felna lamah chuan sawisêlbo inti ngam ngat a ni (Philippi 3:6). Isua a hmuh fiah hma atang tawhin Pathian ṭih mi, Pathian duhzâwng nia a hriat chu tihhlawhtlin tum tlat mi a ni tih a chianna chu, Kristiante a tihduhdahna chhan kha Pathian sawichhetu ni tlata a hriat vâng a ni. Pathian sawichhetu chu Tân Ina khung vek a duh a, chu chu Pathian duhzâwng niin a hre bawk.

Damaska dâiah Isua nên an intâwk ta a. Thudik leh thutak a hmu fiah ta. A lo tidik lo hle ih îhè lovin a pawm hmiah. A inngaitlâwm tihna a ni. Mahni tih dik loh pawm duh tlat lo chu mi chapo an ni châwk. Rawngbawlna marathon race-ah hian Paula hi a tlân ṭan tirh chuan Barnaba hnungah a tlân a, Isua zirtirte hmâah a tlân duh lo. Mahse, a hnuah chuan midang zawng zawng hmâah tlân tluan parhin world record a siam ta a ni.

Upa Dr. KL Biakchungnunga hi April 23th 1964 ah Rev. KL Vanngaia leh Pi Tlangmawii te inkarah a piang a. Zirnaah hian a graduate hnu-ah Pathian thu lamah pawh sulhnu neiin M.Div a zir zo va, M.A, M.Phil tha taka a zawh hnuah Ph.D pawh tha takin a zo leh a ni. Kum 1996 atangin Baptist Higher Secondary School (BHSS) ah Mizo subject a zirtir a, kum 2003-2008 chhungin Headmaster hna a chelh bawk. A lehkhabu chhuah te zinga mi hriat hlawh zual chu ‘Point of view – Volume I,II,III’ te an  ni.