Tirhkohte Thiltih. Zirlai 12-na. Tirhkohte 2:25-36

TIRHKOHTE 2:25-36 MIZCLBSI

[25] Davida pawhin a chungchâng hetianga a lo sawi kha: ‘Ka hmaah Lalpa ka hmu fo va, ka bulah a awm a, eng mahin mi tinghîng thei lo. [26] Chuvângin, ka thinlung a hlim a, ka lei pawh a lâwm a, ka tisa pawh hian a beisei tlat a ni. [27] Ka thlarau mitthi khuaah i hnutchhiah lo va, I mi thianghlim ruang a ṭawih i phal hek lo. [28] Nangin nunna kawng mi kawhhmuh a, I hmêl hmuin lâwmin ka khat ang,’ tiin.

[29] “Unaute u, thlahtu Davida thu chu huai takin ka hrilh a che u, ani chu a thi tawh a, an phûm a, a thlân pawh kan bul lawkah a la awm reng alâwm. [30] Ani chu zâwlnei a ni a, a thlahte zînga tu emaw a lalṭhutthlêng luah tûrin Pathianin a hnênah a tiam tlat tih a hria a; [31] ‘mitthi khuaa hnutchhiah ni lovin, a ruang pawh a ṭawih loh tûr thu’ a sawi hi, Krista thawhleh tûr thu a sawi a lo ni.

[32] A ni, chu Isua chu Pathianin a kaitho leh ta a, chu thu hretute chu kan za hian kan ni. [33] Pathian ding lamah chawimawi a ni ta a, Pa hnên ata Thlarau Thianghlim tiam chu a dawng a, in hmuh leh in hriat hi a thilpêk a rawn leih chu a nih hi. [34] Davida chu vânah a lâwn chho lo ve; amah ngeiin, ‘Lalpa chuan ka Lalpa hnênah, ka ding lamah lo ṭhu rawh, [35] I hmêlmate i ke nghahchhanah Ka han dah ang e,’ a ti e, a ti zâwk a nih kha. [36] “Chutichuan, Isua in khenbeh kha, Pathianin Lalpaah leh Kristaah a siam ta ngei tih Israel mi tinin hre ngei rawh se,” a ti a.

Sawi Zauna: Petera hian Isua thawhleh thu chhunzawmin Sam 16:8-11 a sawi chhuak a. He Sam phuahtu lal Davida pawh hian Isua chungchang ngei a lo sawi a ni, tih a sawi a. Davida khan Sam Bu-a hla tam tak a phuahte kha ama chanchin a nih rualin, khang hla thute kha Isua chunga thil thleng tur a lo ni thin. Hei hi Petera hian a rawn hrilhfiah a ni. Davida zawng a thi a, a thlan pawh hmuh theih a ni a, a ruang pawh a tawih a ni. Sam 16 ami hi chu a ruang a tawih lo va, mitthi zinga ta kaihthawh leh a ni thung a ni. Chuvangin Sam 16-in a sawi hi Davida ni lovin Isua ngei a ni, tih hi Petera sawi chu a ni.

An sawi thin; Sam Bu-a hlate a puma sa theitu chu Isua chauh hi a ni. Isua ruang chu mitthi zingah hnutchhiah a ni lo va, Pathianin kaithovin a ding lamah a chawimawi a, a lo tiam tawh Thlarau Thianghlim chu a rawn leih ta a ni. Sam 110 a Pathian ding lama thu pawh kha Isua ngei a ni, tiin Petera hian a chhunzawm a.

Petera thu sawi a chhinchhiah tur thenkhatte: a) Thuthlung Hluia hril lawknate Isuan a hlen chhuak. A nun, a thihna, a thawh lehna, Pathian ding lama chawimawi a awm tak  thute kan hmu. b) Davida kha zawlnei a ni. Pathian Thlarauvin hriat tirin heng thu, Isua chungchang lo lawi sawi lawktu a ni. c) Isua hi Pathian ruat, a hriak thih, Mesia, Lal leh Chhandamtu (Lord and Christ) a ni.

Ngaihtuah atan

21. Sam 16 leh 110-te uluk takin chhiar la, Isua chunga thil thlengte an lo sawi lawk dan zir chiang rawh.

22. Davida hian Sam Bu-a hlate a phuah lai hian Isua lo kal tur hi hriain i ring em, eng chen nge hriaa i rin?