TT Zirlai  9-na, TIRHKOHTE 2:12-15

TIRHKOHTE 2:12-15 MIZOVBSI

Tin, an za chuan mak an ti hle mai a, a ngaihna an hre lo va, “Hêng hi eng tizia nge ni?” an inti a. [13] Ṭhenkhatin an nuihsan a. “Uain thar an rui a nih hi,” an ti a.  [14] Nimahsela, Petera chu sâwm leh pakhatte nên an ding za a, ani chuan aw ring takin an hnênah a sawi a, “Nangni Judai rama mite u, nangni Jerusalem khuaa awm zawng zawngte u, hêng hi hria ula, ka thu pawh ngai rawh u. [15] Hêngho hi in rin angin an rui lo ve, fehrehsân lai chauh a nih hi.

Sawi Zauna : Thlarau Thianghlim Pentikos niah a lo thleng a. A lo thlirtute an buai a. A then, uain thar an rui a ni, ti tawk an lo awm a. Mihring hi chuan thutlukna dik hi kan siam thiam lo khawp mai thin a. Kan duh zawng, kan rilru rem zawng deuhte hi kan sawi mawi mai thin a. Thil in ang reng pawh kan ngainat vak loh chu kan sawi chhe mai a. A nih loh pawn kan ngawi bo mai thin. (I fak duh zawng min an sawisel emaw, i lawm vak loh thil an fak tak emaw i hriatin i rilru chhungril a rawn lang chhuak thin ang.)

Petera zirtirte aiawh, an spokesperson-ah tangin ring takin a rawn au chhuakin Tirhkohte Thiltih bu a sermon hmasa ber a rawn sawi ta a.

 Petera thusawi hi hlawm thumin fel takin a in then a:

1. Chang 14-21: Thil thleng a sawi fiah. Hemi tum hi chuan Thlarau Thianghlim an chan, a lo hmututen an hriatthiam loh a rawn sawi fiah a ni.

2. Chang 22-36. Isua chanchin tha a puang. A thih, a thawh leh, Thuthlung Hlui a thuziak ama chungchang a nih thute. Isua hi engkim inghahna, centre of history a nih zia a sawi.

3. Chang 37-49: sim a baptisma chang tura sawmna (exhortation).

Hetiang zulzui tho hian bung 3 leh bung 10 ah Petera hian a sawi leh a. Bung 13 a Paula thusawi pawh hetiang tho hi. Thil thleng sawi fiah – Isua chanchin – sawmna. Hetiang zul zui a thu ziak hi lehkhathawnho-ah pawh hian a awm nawk mai.

‘Fehrehsan’ hi Mizovin hun kan sawina tawngkam pakhat a ni a. Zing chaw an ei zo a, ram lama feh tura an chhuah fel hnu khua a reh chhoh hun, zing dar 9 vel lai hun sawina a ni.

Juda-ho hi Pentikos lai hian an inthawi thin a, zing lamah chaw an nghei thin. Chhang leh uain hi an chaw chu a ni mai a. A chang chuan an lo in hnem deuh thin a, ruih te pawh an rui hial thin a ni awm e. 1 Korinth 11-ah pawh kan hmuh kha.

Petera hian uain in hun, chaw ei hun pawh a la nih loh hi, tiin a sawi a ni. Ngaihtuahna pangngai pu tan chuan uain ruihna hun a ni lo tih a hriat mai lawm ni, a ti a ni.

Ngaihtuah atan:

15. I rilru rem zawngte hi Pathian Thu nen a in mil thinin i hria em?