MI FING LEH MI A – Lalchuangliana

Kan Bible-ah hian mi fing leh mi a chanchin hi a tam hle a, mahse Bible-in  engtinnge a sawi tih lam hi tuna kan ngaihtuah atana ka tih a  ni lo va. Mi fing nih hi kan duh theuh mai a, mi fing tehna awl ber chu mahni nihna hre chiang hi an ni an ti thin a. Mi a kan tihte pawh hian, “Kei zawng mi a ka ni a,” a tih chuan, “A va fing roh e,” kan ti leh si a. Pathian hian mi vantlang hi a duh ber a, a siam tam ber bawk an tia lawm! (I awih em?) Mi fing lutuk (genius) ni  lo, mi a ni leng ni lote hi ‘mi vantlang’ kan tihte thu an ni mai awm e, keipawh mi vantlang  niin ka inhria.

Mi fing bik tak leh thil thiam bik hi an awm ngei mai a, englai maha mi vantlangin kan tluk loh tur hi an awm thin. Mahse mi thiam bik (genius) leh mi a (mental case) inkar hi a zim khawp mai an tih bawk chu mawle!  Chu chu Vashishtha Narayan Singh-a chanchin hian a tichiang awm e.

VN Singh hi Police Constable fapa niin 2 April  1946 khan Bihar Bhojpur District- a Basantpur khuaah a lo piang a. Naupang danglam leh lehkha thiam thei tak mai a nih an hre thuai a. Patna Science College-ah BSc (Mathematics) kum 3 Course chu kum khatah a zo va. MSc (Maths) pawh kum khat chhungin a zo. Kum 19 mi lek a nih laiin USA ah kalin University of California, Berkeley-ah   a lut a, kum 23 mi a nihin
Dr. John L. Kelly hnuaiah PhD a zo va, a subject chu: “Reproducing Kernels and Operators with a Cyclic Vector (Cycle Vector Space Theory)”  tih a ni. A mik a mak hria kan awm em?

University of Washington- ah Assistant Professor in kum 4 chuang a thawk a Kum 1974 ah India rama lo kir lehin IIT, Kanpur, Tata Institute of Fundamental Research, Bombay leh Indian Statistical Institute, Calcutta-ah te a thawk kual a. Mahse rilru buainain a bual tan a, Central Institute of Psychiatry, Ranchi ah kum 1985 thleng a awm a. Chutah anmahni khua Basantpur- ah a lo kir leh a. Kum 1989 khan Pune kal tur relah a chuang a, a bo ta daih mai a, kum 1993 khan Saran District-a Doriganj khuaah kutdawh ang mai hian an chhar leh ta a. Film Star Satrughan Sinha leh Sawrkar lam pawhin an buaipui em em a, NIMHANS,
Bangalore leh Institute of Human Behaviour and Allied Sciences, Delhi ah te enkawl a ni a. A lo ziaawm leh deuh a, 2014 khan Bhupendra Narayan Mandal University, Madhepura, Bihar -ah Visiting Professor in an dah leh  a, kum 73 mi niin 14 November 2019  khan Patna Medical College & Hospital-ah a thi ta a ni. A that lai rei lutuk lo chhunga a thawh that vangin India Sawrkar chuan kum 2020 khan Padma Shri (posthumous) an hlan.

Pathianin mi vantlanga min siam leh min dah hi i lawm ang u.