CHIN VE ATANA THA  ( With apology to Art Buchwald) – Lalchuangliana

Ka thianpa nen Taxi- ah kan chuang a, kan han chhuk chu Taxi Driver hnenah chuan, “Motor khalh i va han thiam.. i taxi- a chuan a nuam hle mai,” a ti a. Taxi Driver chuan a tiel emaw a ti a, “Ka pu, min bawlzan deuh a ni maw?” a ti a. Ka thianpa chuan, “Bawlzan lo ve. Traffic tawt laia i khalh thiamziate, kha…” a ti a, Taxi pu chu hlim hmel pu takin a inkhalh liam leh ta a. Ka thianpa hnenah chuan, “Khatiang khan dawt pawi lem lo i sawi zel dawn em ni?” ka ti a. Ani chuan, “Han ngaihtuah teh. Kha Taxi pu khan vawiinah mi sawm chuang chu a phur ngei ang a, a passengerte kha hlim sangin a  bia ang a, a passengerte lah chuan ‘Kan driver chu taxi khalhtu dang a va ang lo ve,’ an ti ang a, nilengin rilru hlim takin an awm dawn a
ni. Tichuan mi 20 chuang engmah sengso si lovin kan tihlim mai dawn a ni,” a ti a.

Kan kal zel a, ka thianpa chuan dawr pakhatah hian mawza ka han lei lawk ang e a ti a, kan han ding leh ta a. Nu pakhat chum lam deuh,  hmel pawhin puak ti lem lo hian mawza chu a rawn phawrh teuh mai a. Ka thianpa chuan, ” In mawzate chu an mawiin an va tha em! Ka duhzawng tak an ni, duh aia tam lei a va awl dawn em! A man te engzatnge ni le?” a ti a. Chu nuin a man a han hrilh chuan, ” E khai, in va zuar man thei zawk ve le… pahnih hi ka lo lei ang e,” a tih pah chuan, “I kawr hak rawng chu a mawiin i va inhmeh ve le,” a han ti leh bawk  a. Kan chhuah hnu chuan ka thianpa chu, “Chu nu chu i va bawl kual nasa ve,” ka ti a. Ani chuan, ” Ni lo ve, a mawza zawrh kha ka mamawh tak a ni a, hetiang hi a man a sawi aia tlawm khan ka lei tawh a. Mahse kha nu khan vawiin chuan hlim takin amah rawn dawrtute kha a be ngei ang a, a kawr te kha a bih deuh reng ang a. Mawza lei tur an lo kal a nih chuan a man kha a tihhniam sak ngei pawh ka ring. Tichuan hlimna leh lawmna kan thehdarh zel  a ni mai a ni,” a ti a. Ka rilru tete chuan, “A ni mai awm tak e,” ka ti rauh rauh va, ka thianpa tih ang chuan tih ve pawh ka tum ta a.

Aizawlah High School ka luh chhoh tirh hian thingtlang tleirawl zakzum tak ka ni a. Vawi khat chu Bara Bazar kawng chung tuna Hospital Road tihah hian ka thianpa nen  kan kal laiin kawng sirah nula keini aiin rual u deuh tawh hi an lo awm a. Pakhat chuan min lo thlir reng a, kan kal pelh dawn chuan, ” Chu tlangval chu a va hmeltha ve aw..” min lo ti a. Tunge a nih pawh ka hre lo va, amah pawhin min hre zui bawk hek lo. Hmeltha ka nih pawh hre lo khan chutia min lo tih takah chuan hmeltha ni awm te chuan ka han inngai ve ngawt a ! Kha nula thusawi kha ka hre chhuak fo va, min tinuam veng veng ve tlat a ni.

Vawinah  kan office naah emaw, kan bazarin emaw, tuemaw pakhat tal hi an thatna lai hmuin fak ila. Infak hi tumahin kan haw lo va, awm tinuamtu  a ni. Tichuan mi tam tak hnenah hlim leh lawmna thlentu kan ni mai dawn a, chutia kan tih zel chuan kan chhungkua, kan kohhran, kan pawl, kan khawtlangte hi a va nuam dawn em! Tumah hi thatna lai engemaw tal nei lo kan awm si lo va. Kalkawng sira ui thisawn lo let reng pawh kha mi pakhat chuan, “A ha chu a va tha em!” a ti hram e an tih kha. Kan politician tha lo tia kan sawi huai huaite pawh hi an thu sawi uar lutuk leh an dawt sawite pawh,  kan titi sawi nuam ti tamtu leh min tinui tamtute an nih hi!