IDOL

August ni 5, 2020 khan Ayodhya hmunah Prime Minister Modi chuan Ram Temple sak tur Foundation a phum a, kum 3 chhung vela sak zawh tura ruahman kha a ni a. (Ram Mandir hi Jaunary ni 22, 2024 khan hawn a ni ta). Inthlanpui dawn apianga BJP leh RSS lamin an vuak vun thin kha a reh tawh ang a, thawkhat a veng ang. Rama leh Sita hi a thenin kum BC 7000 hma lam mi niin an sawi a. An chanchin Ramayana ziaktu Valmiki hi misual rukruk ching, ram hnuaia tei mai mai thin, Shudra an tih thin, puithiam Nadda bula piangthar, a meditation pawh a rei lutuk a, fanghmirin bu an lo chheh hnan bur tawh a, chu vanga a hming pawh Valmiki, (fanghmir bawm-a)  tih a ni awm e. Chu lam chu kan sawi tur
a ni lo.

Mizo tawnga leh har deuh mai chu “idol” tih hi a ni leh ta. Mizo tawngin ‘milem’ kan ti deuh ber a, ‘idol worship’ chu milem bia kan ti a. Mahse ‘picture,’ ‘image’ te pawh milem kan ti leh vek si a, ‘idol’ leh ‘picture’ te chu a inang lo hle si. Ram Temple ah chuan a lim/ a lem hmaah an bu leh suau suau ang a, keini chuan milem bia kan ti leh mai ang a. Chutiang milem hmaah kan kun ve loh vangin milem kan be ve lo kan inti mai awm e. Anmahni pawh hian ‘milem bia’ an inti hauh lo va, pathian bia an inti ve tho va, pathian lah chu maktaduai 30 chuang an nei a, thlarau nei ve tho an ni.

‘Idol’ hi kan lo be theuh mai zawk a. Thalaiten kan idol biak tur ‘Mizo Idol’ kan thlang a, kum tharah a dang kan thlang leh a. Thenkhat chuan sum hi kan idol a ni a, a then chuan kan fate hi kan idol an ni a, a then tan chuan kan in leh lo hi kan idol a ni a. A then chuan Film Star, inkhel thiam, zai thiam etc kan lo ‘idol’ a. Pathian tak aia kan mit, kan ngaihtuahna, kan hmangaihna, kan hun leh ka thiamna latu reng reng hi kan ‘idol’ an lo ni thin.

Heng zawng zawng aia idol lian ber, kan kawl reng, kan duat ber, kan chei hleuh hleuh, a chang leh kan duh luatah kan han sawisa kual vel bawk thin a awm – chu chu ‘mahni’ hi a ni. Engkimah thu neitu nih kan duh a, meetingah kan thu a tlang hle chuan rorel tha luaah kan inngai a, Pathian biak inkhawmah Midangte hlimin lam mup mup mah se kan hlim ve loh chuan ho mai mai kan ti hlauh va. Thil kan ei duh zawng chu midangin nei lo mah se kan pawiti vak lo va. Thil tha leh hlu kan hmuh chu midang hriat ve kan hlau va, mahnin pumhmawm kan duh.  ‘Mahni’ hi kan idol ber, nitina kan biak thin chu a lo ni. “I am the Captain of my soul, I am the Master of my fate” kan ti thin a nih hi. Mahni aia Pathian kan dah hmasak a, kan duh leh hmangaih ber a nih chuan Pathian tak biain, milem ‘idol’ kan be be lo a ni ang. Sakhaw dang mite,  milem siam chawp hmaa an kun kan hmuh hunah ‘heng milem be ho hi’ kan tih hmain keini pawh eng milem  nge  kan biak, kan pathian ‘ idol’ chu enge ni  tih hi i ngaihtuah thin ang u. Tichuan biak tur dik tak, a lem ni lo, Pathian nung chu tunge ni tih  kan hre thei ang.